"Polo San Xoán, a sardiña molla o pan”, que di o refrán. Velaquí che traemos unha proposta de receita que de seguro non te deixará indiferente.

Ingredientes (para 2)

• 6 sardiñas (limpas e abertas en libro na peixaría)
• 1 berenxena
• Pan de millo (ou outro calquera)
• Vinagre de mazá ou zume de limón
• Media culleriña de sal
• Media culleriña de cúrcuma
• Media culleriña de comiño
• Unhas areas de pementa
• Auga
• Aceite de oliva virxe extra

Modo de preparación

1. Lavamos con coidado as sardiñas. Como xa che comentamos, pide que chas limpen na peixaría. A preparación vaiche ser máis sinxela así.
2. Nun recipiente fondo poñemos medio vasiño de auga, algo menos de medio vaso de vinagre de mazá e as especias. Metemos as sardiñas e deixamos macerar máis ou menos dúas horas.
3. Prequentamos o forno e nunha bandexa poñemos a berenxena cortada en láminas dun centímetro. Cubrimos cun pouco aceite. Metemos no forno.
4. Aos 5 minutos engadimos á bandexa as sardiñas. Metémola bandexa de volta no forno uns 10 minutos. Non máis.
5. Tostamos o pan e montamos as tostas con berenxena e sardiñas.

E xa estaría listo! Agora só queda gozar deste riquísimo prato! Como o ves? Atréveste coa nosa proposta? Sube as fotos ao teu Instagram e etiquétanos!