Se hai unha receita de peixe que guste e convenza a todo o mundo por aquí esa é a que vos describimos a continuación: o peixe sapo en salsa verde. Supoñemos que xa estás correndo por algo para limpar a baba que che está caendo mentres pensas no resultado final desta receita. E aínda por enriba é moi fácil de preparar! Vexamos como.

Ingredientes

• 4-5 pezas de peixe sapo
• 100 gramos de ameixas
• AOVE (aceite de oliva virxe extra)
• Allo
• Cebola
• Caldo de peixe (un cuarto de litro máis ou menos)
• Pirixel fresco
• Sal
• Fariña

Modo de preparación

1. Picamos ben picadiños a cebola e o allo e rustrímolos nunha tixola fonda con aceite de oliva virxe extra aproximadamente uns 10 minutos. Lembremos: lume suaviño.
2. Pasado este tempo engadimos unha cullerada de fariña para que espese a salsa.
3. Feito isto incorporamos o caldo de peixe. Aquí temos dúas opcións: utilizar caldo feito na casa ou recorrer a caldo xa preparado (podemos compralo en calquera tenda de alimentación). Remexemos un pouco para que se mesture.
4. Incorporamos o peixe sapo e as ameixas (hai que limpalas previamente).
5. Deixamos que se faga na salsa durante uns 10 minutos máis ou menos. Dámoslle a volta ás pezas de peixe sapo cando vaian pola metade da cocción.
6. Cando falten uns minutos picamos o pirixel e esparexémolo pola salsa.
7. Agora só queda empratar!

Ves como é unha receita moi fácil de preparar? Agora xa non tes escusa. Atrévete con ela e comparte o resultado final etiquetándonos no noso Instagram: @vaidepeixe.