Para este Nadal a proposta de Vai de Peixe é actualizar un produto clásico nestas datas: o bacallau, pero innovando na receita.
O bacallau é unha proposta típica do Nadal pero é un clásico en inverno e primavera. Innovamos a receita.
Antes de empezar preguntámosche: que sabes deste peixe branco cuxo hábitat son os mares do Norte? Algúns datos:
- Viven en augas con temperaturas que oscilan entre os 4 e 6 graos.
- A súa tempada de pesca vai desde decembro ata maio.
Máis cuestións: sabías que este peixe converteuse hai séculos en sospeitoso habitual do menú do Nadal debido a que a véspera figuraba dentro do calendario eclesiástico de vixilias?
Aínda que no Concilio Vaticano II (1959) suavizouse a abstinencia de carne, o costume de poñer bacallau na mesa de Nadal xa estaba establecida e cealo acompañado de coliflor xa tiña moita tradición en Galicia. Un costume que se reforzou grazas ao seu prezo; accesible para todos, e fácil conservación; a través da salgadura.
Un peixe de gran calidade nutritiva, baixa achega calórica e económico, unha opción gastronómica completa e versátil. Toda unha suma de calidades e circunstancias que o sitúan como un dos produtos máis empregados nestas datas nas cociñas galegas.
Triunfa coa proposta de Vai de Peixe a través da receita de @micuegastrohome. Este cociñeiro con raíces galegas actualiza o clásico e convérteo en "Potaxe de Bacallau descontextualizado". Imos ver a receita.
Bacallau
- 400 gr. filetes de bacallau
- AOVE
- Un chisco de sal
- Un chisco de pementa
- 4 culleradas de aceite de oliva
- 1/2 vaso de viño branco
Modo de preparación
- Prequentar o forno a 180 graos.
- Mentres tanto quenta ben o ferro, pinta o bacallau con AOVE e márcao por ambos os lados ata que estea tostado.
- Salpimenta e coloca nunha fonte para forno, sobre unha cama de AOVE e viño. Introduce no forno durante 15 minutos a 180 graos.
Durante eses 15 minutos prepara o humus e as espinacas:
Humus
- Medio quilo de garavanzos cocidos
- Un chorro de aceite de sésamo ou oliva
- 2 dentes de allo pelados
- Un chorro de zume de limón
- 1/2 culler pequena de comiño
- Un belisco de pemento doce
- Un chisco de sal
Modo de preparación
- Pon no vaso do batedor os garavanzos escorridos, dentes de allo, sal e comiño e bate ata que se faga unha masa.
- Engade o zume de limón e o aceite. Tritúrao co batedor ata que teñas unha mestura que se asemelle a un puré de consistencia cremosa. Se queda moi denso engade un pouco de auga pero pouca, para que non quede augado.
* O pemento é para a decoración final.
Espinacas fritidas
- 250 g de espinacas
- Aove
- Viño branco
- Sal
Modo de preparación
- Nunha tixola pon o AOVE a quentar e cando alcance temperatura engade as espinacas frescas, sal e remóveas ata que reduzan.
Empratado
Prepárate para o toque final: coloca nun prato un lombo de bacallau, pinta co humus, coloca entre ambos as espinacas e esparexe un pouco de pemento. Xa sabes que a comida tamén entra polo ollo, así que non esquezas regalar un prato apetecible.