Estás no certo, das latas de conserva. Bonito, mexillóns, calamares, sardiñas, xarda... Ao natural, en aceite de oliva ou con calquera tipo de mollo, coma o escabeche. Sabes de que estamos a falar? Estás no certo, das latas de conserva. Agora que xa temos claro que cociñar produtos do mar non é nin difícil nin caro, en Vai de peixe propuxémonos que cando penses en conservas de peixe e marisco vaias máis alá de engadir de cando en vez unha lata de atún a unha ensalada. Aquí che deixamos cinco deliciosas receitas coas que non pasarás máis de quince minutos na cociña. Prometido!

ENSALADA DE SARDIÑAS E ALCACHOFAS

INGREDIENTES

• 1 lata de sardiñas en aceite de oliva
• 1 lata de corazóns de alcachofa
• 1 cenoria
• Media cebola
• Media lata de apio raiado

COMO PREPARALO

Abre a lata de corazóns de alcachofa, córtaos pola metade e colócaos nun prato. Pela a cenoria e a cebola, córtaas á xuliana, mestúraas co apio e engádeas. Despois, abre a túa lata de sardiñas, escoa o aceite e ponas enteiras sobre as verduras. Por último, aliña ao teu gusto.

SALPICÓN DE BERBERECHOS E MEXILLÓNS

INGREDIENTES

• 1 lata de berberechos ao natural
• 1 lata de mexillóns ao natural
• Medio pemento verde
• Medio pemento vermello
• Media cebola morada
• Unha pataca
• Un ovo
• Aceite de oliva
• Vinagre
• Sal

COMO PREPARALO

En primeiro lugar, pon a cocer o ovo e a pataca. Mentres están ao lume, aproveita para facer a vinagreta deste salpicón, para a que terás que poñer nun vaso aceite, vinagre e sal, engadir os pementos e a cebola ben picados e remover ben cun garfo. Cando teñas todo listo, corta en anacos a pataca e o ovo, abre as latas cos mexillóns e os berberechos, mestura todo e régao coa vinagreta.

BOCADILLO DE VENTRECHA DE ATÚN

INGREDIENTES

• 1 lata de ventrecha de atún
• 1 pemento vermello
• 3 lascas de queixo
• Pan
• Aceite de oliva

COMO PREPARALO

Corta o pan á metade e o pemento en tiras e quéntaos un minuto nunha tixola. Coloca o pemento sobre unha das metades do pan, coloca o queixo enriba e por último, o atún. Engade un chorriño de aceite de oliva e tapa coa outra metade do pan.

LENTELLAS CON BONITO

INGREDIENTES

• 1 lata de bonito ao natural
• Medio bote de lentellas cocidas
• 1 ovo
• Media cebola
• 1 presa de tomates cereixa
• 1 presa de olivas negras

COMO PREPARALO

Mentres deixas o ovo a cocer, pica a cebola, os tomates cereixas e as olivas negras. Despois, escoe as lentellas e mestúraas coas verduras picadas. Cando o ovo estea cocido, pícao ben e mestúrao co bonito ben esmiuzado. Xúntao todo nun prato e, opcionalmente, remata con aceite de oliva e pirixel.

TORTILLA DE XARDA E SETAS

INGREDIENTES

• 1 lata de xarda en aceite de oliva
• Medio bote de setas variadas
• 2 ovos
• Media cebola
• Pirixel

COMO PREPARALO

Pica a cebola e rústrea nunha tixola. Escoe a xarda e as setas e engádeas á tixola. Bate os ovos, engádelles sal, pirixel e a mestura que tiñas no lume. Por último, quenta todo ben na mesma tixola que usaches antes.